Pluijm aanza kuwanyooshea kidole waamuzi ligi kuu

Kocha Mkuu wa Yanga, Hans Pluijm amesema ikiwa waamuzi hawatazingatia kanuni na taratibu katika uchezeshaji, huenda ladha ya ligi ikapungua.

“Waamuzi wanapaswa kuwa makini muda wote kwa kuchezesha soka kwa kuzingatia kanuni na taratibu, inapunguza ladha unapoona mwamuzi alitakiwa kutoa adhabu katika eneo fulani lakini anaminya,” amesema Pluijm baada ya kushuhudia mwamuzi Ahmed Seif aliyechezesha mechi kati ya Mbao FC na African Lyon akitoa uamuzi wenye utata.

Mjumbe wa Baraza la Michezo Tanzania (BMT), Jamal Rwambow licha ya kukiri ligi ya msimu huu itakuwa na ushindani mkubwa ameonyesha wasiwasi wake kwa waamuzi akidai huenda wakachangia kuvuruga ligi hiyo.

“Niwe muwazi, ligi ni nzuri na yenye ushindani. Unaona timu zimesajili na zinapambana kusaka matokeo katika kila mchezo. Wasiwasi wangu uko kwa waamuzi, maana tunaweza kuwa na ligi nzuri lakini waamuzi wakatuangusha kwa kutofuata kanuni na taratibu,” amesema Rwambow ambaye ni ofisa mstaafu wa Jeshi la Polisi.