Lowassa ataja mapungufu miezi 10 ya Magufuli

Ni wazi nabii hakubaliki kwao kwani awali kabla ya Uchaguzi Mkuu wa mwaka jana kufanyika wananchi na baadhi ya viongozi walinukuliwa wakisema kwa hali ilivyo na nchi ilipofikia inahitaji kiongozi mwenye maamuzi magumu atakayeweza kuweka mambo kwenye mstari kwani ni dhahiri baadhi ya mambo yalianza kwenda mrama.

Tangu kuapishwa kwake Novemba 5, mwaka jana tayari Rais Magufuli amekaa madarakani kwa takribani miezi 10 na siku 10 hadi hii leo akiwa tayari amefanya mambo kadhaa yenye tija kwa taifa ikiwemo operesheni tumbua majipu ambayo imerejesha nidhamu ya kazi na kukuza uwajibikaji na uaminifu kwa wafanyakazi wa umma.

Kama ambavyo wazungu husema “wherever there is positive there must be negative” pamoja na mengi mazuri yaliyofanywa hadi sasa na Rais Magufuli aliyekuwa Mgombea Urais wa Chama cha Demokrasia na Maendeleo (Chadema) chini ya mwavuli wa Ukawa Edward Lowassa ameibuka na kusema licha ya kwamba serikali iliyopo madarakani inafanya vizuri lakini suala la ukandamizaji wa demokrasia ni tatizo kubwa ambapo lisiposhughulikiwa mara moja litaleta madhara makubwa kwa taifa.

Kuhusu suala la elimu Lowassa amesema suala la elimu bure halikupaswa kuanzia na uchangiaji madawati badala yake maslahi ya walimu yangezingatiwa kwanza ili kuepusha migogoro ya mara kwa mara baina ya waalimu na serikali kutokana na ulimbikizaji wa stahiki zao. Akasema kama angekuwa rais jambo la msingi katika sekta ya elimu ambalo angeshughulikia mara moja ni mishahara ya waalimu na maslahi yao kwa ujumla badala ya kuhangaika na madawati.

Kuhusu operesheni Ukuta ambayo inatarajiwa kufanyika Oktoba Mosi baada ya kuahirishwa Septemba Mosi ili kupisha viongozi wa dini na serikali kutafuta suluhu ya hatma ya ukandamizaji demokrasia nchini, Lowassa amesema kama muafaka hautapatikana wataona namna ya kufanya ili uhuru wa demokrasia uzingatiwe nchini kwa kuwa anaamini demokrasia ni kukaa meza moja na kukubaliana.